पाऊस

*पाऊस*

सर सर घोंगावत सुटला हा, खट्याळ चपळ वारा ।

श्वासा मागुन श्वास घेतसे, ठेवी जपून सारा ॥

असा खोडकर मुलासारखा, नकोस मागे धावू ।

मेघराज बरसता धरेवर, थेंबा थेंबा पाहू ॥

अलगद पडता धरणीवरती, सरी वर सरी ।

पहिली वर्षा , थेंब टपोरे, पडु दे अंगावरी ॥

चिंब जाहली रसा, उमलल्या तृषार्त तरु-वेली ।

दर्‍या, डोंगरे जणु पांघरल्या, गर्द हरित शाली ॥

सरिता, नाले तुडुंब भरुनी, खळखळ वाहे पाणी ।

नीतळ निर्झर धावत गाती, मंजुळ स्वरात गाणी ॥

सृष्टीचा शृंगार नजारा, पाहू भरून डोळे ।

जलधारांच्या कृपा वृष्टिने, सुख पायाशी लोळे ॥

✍ सौ. प्रतिभा विभूते,

          पुणे.©®